Хөлбөмбөгийн их спортын түүхэнд өөрийн гэсэн орон зайг бий болгож, нэрээ мөнхөлсөн Бразилийн алдарт хөлбөмбөгч Рональдо ирэх жил зодог тайлахаар шийдсэн тухайгаа мэдэгдлээ. 18 настайдаа 1994 оны Дэлхийн аварга шалгаруулах тэмцээнд Бразилийн шигшээ багт багтаж, анхныхаа дэлхийн аваргын цом хүртсэн тэрбээр хожим нь 2002 оны дэлхийн аваргын төлөө Германы багтай тоглож, өрсөлдөгчийнхөө хаалганд хоёр гоол оруулж байсан билээ. Өдгөө тэрбээр төрөлх нутагтаа “Коринтианс” багт хүчин зүтгэж байгаа юм.

Мэргэжлийн сумо бөхийн 69 дэх ёкозуна Хакухо М.Даваажаргал өчигдөр Токиогийн төвд байрлах ”Prince” зочид буудалд хуримаа хийлээ. Залуу их аваргын хуримын ёслолд Японы улс төр, урлаг, соёлын алдартнууд оролцсон бол түүний гэр бүлийнхэн болон Кёкүшюзан Д.Батбаяр, даян аварга Г.Өсөхбаяр нарын 70 орчим зочид монголыг төлөөлөн хуримын ёслолд оролцжээ.

Мэргэжлийн сумо бөхийн их аварга Асашёорюүг зодог тайлсантай холбоотой мэдээлэл өнөө хэр Японы хэвлэл, мэдээллийн хэрэгслийн анхаарлын төвд байсаар байна. Асашёорюүг Хавайн арал хүртэл дагаж, мөрдөх болсон хэвлэлийнхэнд хэдхэн хоногийн өмнө арлын оронд хөл тавьсан Кёкүшюзан Д.Батбаяр бас нэгэн “өгөөш” болжээ. Сэтгүүлчид түүнийг Японы онгоцны буудалд буусан даруйд нь бүчин авч, их аварга Асашёорюүг зодог тайлсанд ямар бодолтой байгааг нь сонирхсон байна.