“Дэлхийн зөн” олон улсын байгууллагын 25 мянган долларын хөрөнгө оруулалтаар хөтөлбөр хэрэгжүүлдэг Завхан аймгийн Отгон, Шилүүстэй, Их-Уул, сумдын ерөнхий боловсролын бүрэн дунд сургуулиудад үлгэр жишээ “Хүүхэд хөгжлийн төв”-ийг байгуулж үйл ажиллагаагаа эхлээд байна.

Орхон аймгийн Бүсийн оношлогоо, эмчилгээний төв /БОЭТ/, тус аймгийн “Эрдэнэт ус, дулаан түгээх сүлжээ” компанид өнөөдрийн байдлаар 924 сая төгрөгийн өртэй болоод байна. Энэ нь 2008-2010 оны өр юм.

Хөвсгөл аймгийн 127000 иргэдийн 76400 нь, иргэний шинэчилсэн бүртгэлдээ хамрагдаж бүртгэл 94 хувьтай байна. Шинэчилсэн бүртгэлд хамрагдсан иргэдийн 9000 орчим нь зөрчилтэй байна гэсэн нэрсийн жагсаалт Улсын бүртгэлийн ерөнхий газраас иргэний бүртгэлд иржээ.

Хэнтий аймгийн анхны долгион “Дөлгөөн Хэрлэн” олон нийтийн радиостанц, өөрийн “Дөлгөөн Хэрлэн” төв ТББ-ынхаа Тэргүүн М.Хүдэрбаатарын нэрэмжит, “Эзэн Чингисийн өлгий нутгаа хэн сайн мэдэх вэ” танин мэдэхүйн, бооцоот, шууд нэвтрүүлгийнхээ эхний дугаарыг өнгөрсөн ням гарагт сонсогчдынхоо дунд явуулсан байна.

Булган аймгийн нутгийн захиргааны байгууллагууд 2010 онд иргэдээс амаар 3203, бичгээр 3164, нийт 5467 өргөдөл хүлээн авчээ Хүлээн авсан өргөдөл, хүсэлтийн 99,1 хувь буюу 5420-ийг нь шийдвэрлэн хариу өгсөн байна.