"SpaceX"-ын хуульчид компанийн нууцын зэрэглэлтэй мэдээлэлд нэвтрэх зөвшөөрлийг Элон Маскт олгохгүй байж магадгүй. Тус компанийн 400 орчим ажилтанд ийм зөвшөөрөл байдаг ч гэлээ Маскт боломж олдохгүй бололтой.

Аюулгүй байдлын зөвшөөрөл гэх албан ёсны нэршилтэй энэхүү зөвшөөрөл нь аливаа байгууллагын дотоод нууц мэдээлэл, эмзэг байгууламж, аюулгүй байдлын системд нэвтрэх боломжийг хүмүүст олгодог засгийн газрын зөвшөөрөл юм. Энэ нь тухайн хүнийг найдвартайд тооцож, үндэсний эрх ашигт аюул учруулахгүй гэдгийг баталгаажуулж буй зөвшөөрөл болно.

Оросын ерөнхийлөгч Путин тэргүүтэй гадаадынхантай байнга харилцдаг, хар тамхи хэрэглэдэг гэх цуурхалд өртдөг зэрэг шалтгаанаас нь болоод Элон Маскт энэ зөвшөөрлийг олгоход эрсдэлтэй гэж үзэж байна. Тиймээс засгийн газраас Элон Маскт зөвшөөрөл авч өгөх гэж оролдохгүй байхыг "SpaceX"-ийн хуульчид компанийн удирдлагуудад зөвлөжээ.

Засгийн газрын аюулгүй байдлын зөвшөөрөлгүй бол Маск өөрийн "Starshield" нэртэй тагнуулын хиймэл дагуулын хөтөлбөрийн талаарх тодорхой мэдээлэлд хандах боломжгүй. "Wall Street Journal"-д мэдээлснээр Маск холбогдох ажил хийгдэж буй ихэнх байгууламжид орох хориотой байдаг.

Маск одоогоор "маш нууц" зэрэглэлтэй аюулгүй байдлын зөвшөөрөл эзэмшиж байна. Энэ нь түүнд үндэсний аюулгүй байдлын зарим нууцад нэвтрэх боломжийг түүнд олгодог. Нууц хөтөлбөрүүд дээр ажилладаг ажилтнуудад илүү өргөн хүрээний бүрэн зөвшөөрөл шаардагддаг. Маск илүү өндөр түвшний зөвшөөрөл хүссэнээр одоо байгаа "маш нууц" зөвшөөрлөө ч алдах эрсдэлтэй.

Гэтэл Маск АНУ-ын Засгийн газрын үр ашгийн хэлтсийг удирдахаар томилогдсон учир дээрх асуудал улам дэвэрч магадгүй юм. Ийм нэр хүндтэй албан тушаалд томилогдсон учир тэрбээр маш нууц мэдээлэлтэй хүссэн хүсээгүй удахгүй танилцах болов уу.